XV

Bayat iti biag nga agnanayon
Ikangrunaam ti dumakkel
Pisikal, emosional, sosial
Kangrunaan na spiritual.
Ta adu dagiti banag
Nga mangrunot iti tiempom.

XIV

Ti lubong sirraan na dagiti ridridaw

Tawtawa nga pagballaygian ti tao

Ipupok na dagiti talento nga naisagot

Pagsardingen na iti panunot.

Ngem ti maysa nga addaan panagtalek

Rumbeng tu nga rumagpat

Iti tuktok ti bantay gapu

Ta haan na sinurot iti sangkailubungan.

Haan na ipalubos a matakaw ti bagbagina

Ken padirtaran kadagiti tattao a nararabaw

Kadagiti sumursurot iti linteg ti tao

Nga pumunpunas iti panunot nga awan inggana.

Ala. Agriing ka ket surutem ta pusom

Iyebkas mo ti musika ti biag

Haan mo ipalubos nga diktaran da ka

Ta ti Diyos inikkan naka ti talento.

Imulam.

Sibugam.

Padakkilem.

Pagbungaem.

XIII

Nagriing ka nga awanan pammati

Inubram dagiti banag nga addaan duwa-duwa

Kaanun tupay nga agballigi

Dagita aramid mo nga awanan ayat.

XII

Inaramid mo metlang aminen

Ngem adda maysa nga nalipatam

Nalipatam nga aramiden ti kapategan

Nalipatamun ti agtalek.

XI

Nabayagen idi nagtudo iti kasta launay
Naslep iti rupa
Nalmes iti lua.
Ayannan daydi ragsak?
Ayannan daydi talna?

Awanen.

Wen, wen
Nalpasen iti tudo
Ngem ana ngatan iti ubraem
Agladingit paylang kadagiti pasamak?
Agpanunot ka.

X

Dumteng tu iti aldaw nga agsisinan
Iti agkakabsat, aggiinnulited, agga-ama, agi-ina ken aggagayyem
Nu pay kasta, haan a mapukaw iti ayat nga nabuangay
Makasangit kan tu man ngem addaan kan tu latta iliw.

Dumteng tu iti aldaw nga agpakada ka
Ngem addaan iti namnamma nga makasubli
Awanen naragragsak pay ngem nu di ket
Makitan tu manen iti pamilya nga napateg dita pusom.

Dumteng tu iti aldaw nga mautog mu
Iti kinapateg ti maysa a tao
Isu haan mun ipalubos nga agbabawi ka
Ta ti panawen ket alisto; agawaam ngarud.

IX

Naduma-duma iti tao ditoy lubong
Ngem amin ket naikkan ti talento
Haan mo iparayag dayta
Ta adda met pagkapuyam.

Mataginayon aya nga ragsak
Dumteng ti kapadasan kabsat
Dagiti tao nga inka inlunod
Isudan tu metlang ti pagkamangam.

VIII

Ikidem mo paylang ngata
Nu isu met lang nga isu ti makitkita.
Iturog mo lattan,
Baka sabali pay ti madanon.

VII

Addu ti ammo da,
Addu met ti ammok.
Addu ti di da ammo,
Addu met lang ti diak ammo.

VI

Gagangay nga agrigat
Iti maysa a tao
Maitikleb ken maikaglis ngem
Ti kangrunaan, bumangon tu.

V

Ipariknam kanyada

Nga haan mo ida nilipat

Ta narigat nga isubli

Ti dati, ti napalabas.

Nu umadayo ka

Uray di dakan tu malagipen

Adda kan tu nga mangarakup

Kanya da, isangit da iti iliw kenka.

IV

Alistu lang ti panawen
Isu haan mo sayangen
Kadagiti banbanag
Nga awan importansya na.

Di kan tu agbabawi
Tun mabigbig mo
Ta inyun-unam iti ragsak nga sinsinan
Nu kabaelam kuma iti mataginayon.

III

Adu ti kapadasan ti biag,
Amin ket adda-an iti gundaway nga agdesisyon,
Ngem nu agtalinaed ka iti kinalinteg,
Haan tu nga agkurang iti ayat na kenka.

Laod man wen no daya,
Ti kabusor ikabaelanna
Nga mangisagmak kenka
Ipalubos mo ngata.

II

Kunam inka
Ngem sabali ti tinurong mo
Insagmak mo ti biag
Biag nga awan kenka.

I

Rugyam iti aldaw mo a kas maudi

Ikkatem ladingit ken panagbuteng

Sikan tu metlang ti agbabawi

Nu nalpasen ti amin.

Ipapas mo amin a oras a mapalabas

Ingka-agbanniit, agpasyar

Dim ket ipateg ni Gundaway?

Malpas amin tun ipapatay.

Ala ngarud agriing, bumangon kan

Haan ka agpaituray ti kinasadot

Awan maganab mo, wen!

Imbag laengen ta nangngegannak.

Epigram

Ket daytoy ti surat ti biag ko,
Awan pangisagutan nu di ket ni biag,
Adu ti napasamak, ustu ken haan,
Ngem uray kasta innak selebraran.

Kas pulut, nasam-it la unay,
Kas rig-rigat, nasakit ken nadawel
Kas kanta a nasudi
Biag ko, naisabsabali.

Nu pay kasta,
Isurat ko ket awatem,
Ti init ken ti bulan paneknekan da,
Awan ti ilim-limed, mailimed.

Ti papel marunot tu,
Ngem ti napasamak haan mapukaw,
Wen, malipatan,
Ngem haan da matakaw.